Gazment Bardhi doli sot me një njoftim të ashpër për shtyp, ku mohon kategorikisht që Prokuroria e Posaçme kundër Korrupsionit dhe Krimit të Organizuar të ketë dërguar ndonjë njoftim në adresë të Grupit Parlamentar të Partisë Demokratike.
Sipas tij, “SPAK nuk ka dërguar asnjë njoftim, ndaj stafi politik i grupit nuk ka pasur çfarë të refuzojë”.
Në njoftimin e Bardhit thuhet ndër të tjera se referimi i SPAK-ut i një gënjeshtre të shpërndarë nga Kuvendi “meriton vetëm përbuzje”. Sipas Bardhit, SPAK është në dijeni se nuk i ka dërguar asnjë njoftim grupit parlamentar, ndërsa ofrimi i shërbimeve postare nuk është përgjegjësi e stafit të grupit, pasi në kutitë postare të asnjë deputeti të PD-së në Kuvend nuk ka pasur asnjë njoftim të ardhur nga administrata parlamentare.
Kryetari i grupit parlamentar të PD shpreh “keqardhje për keqpërdorimin politik të Prokurorisë së Posaçme”, që sipas tij po përdoret për propagandë ditore nga mazhoranca socialiste.
Por mbetet e pashpjegueshme se si është e mundur që kryetari i grupit, kryetari i PD-së dhe nënkryetari i PD-së, të tre njëkohësisht nuk e kanë parë faksimilen e publikimit të fletëthirrjes së SPAK-ut ndaj Sali Berishës, që qarkullon në të gjitha mediat, dhe nuk janë interesuar në zyrat e PD-së apo në administratën e Kuvendit për të verifikuar nëse një njoftim i tillë ka mbërritur apo dhe nuk kanë kërkuar asnjë sqarim institucional për dokumentin që lidhet me kreun historik të partisë.
Në vend të sqarimit të faktit thelbësor – që Sali Berisha është thirrur në SPAK – drejtuesit e PD-së, në mënyrë të heshtur ose të qëllimtë, i janë bashkuar të njëjtës linjë politike: asaj të sulmit ndaj Prokurorisë së Posaçme.
Më e çuditshme duket kjo nga ana e zotit Gazment Bardhi, që vetëm disa ditë më parë përshëndeste me zell të madh veprimet e SPAK për hetimet ndaj zëvendëskryeministres Belinda Balluku. A mundet që një politikan tashmë me përvojë të marrë shembullin më të keq të kryetarit të tij dhe të ketë moskoherencën si model të qasjes në marrëdhënien me njerëzit? A mundet që ky SPAK-u të jetë një ditë i mirë kur heton qeverinë dhe një ditë i keq kur heton Sali Berishën apo Arlind Ndrojen?
Duke u rreshtuar përkrah Berishës, trioja drejtuese e PD-së hyn fuqishëm në korin anti-SPAK, një këngë që pritet të vazhdojë gjatë, ndërsa hetimet për 21 Janarin hyjnë në një fazë vendimtare. Dhe me gjasë, siç e ka treguar historia e dy viteve të fundit, për ta shndërruar PD-në në një bunker të ri nga ku Sali Berisha do të godasë kundërshtarin e tij më të madh – Prokurorinë e Posaçme. Se sa për qeverinë apo Edi Ramën, për ata duket se ka menduar dikush tjetër.
