Deputeti i zgjedhur i Partisë Demokratike, Gazment Bardhi, bëri të ditur sot se i është drejtuar zyrtarisht SPAK-ut për t’i vënë në dijeni mbi provat e reja të bëra publike lidhur me dosjen “McGonigal”.
“Sot i jam drejtuar zyrtarisht SPAK për ta informuar mbi të dhënat e reja të publikuara nga Departamenti i Drejtësisë së SHBA për aferën McGonigal. Hetimi amerikan e ka provuar përgjegjësinë penale të Edi Ramës, ndaj SPAK duhet të zbatojë ligjin dhe të mos mbrojë Kryeministrin më të korruptuar në Europë”, shkruan Bardhi.
Dokumenti është dorëzuar në emër të grupit parlamentar të PD dhe është firmosur prej tij si kryetar i grupit. Megjithatë, shkresa, ndonëse mban logon e Kuvendit, nuk ka vulë zyrtare.
Veprimi i tij ngjall disa pikëpyetje: në emër të cilit grup parlamentar ka folur Bardhi? Të atij që e ka përfunduar mandatin apo të grupit të ri që ende nuk është formuar? Madje në Partinë Demokratike nuk është vendosur ende zyrtarisht se kush do të drejtojë grupin parlamentar në legjislaturën e re.
Edhe nëse Bardhi do të rikonfirmohet kryetar, mbetet e paqartë pse ai ka nxituar të dërgojë një shkresë zyrtare në SPAK pa vulën përkatëse?
Për më tepër, tek kjo shkresë del hipokrizia e Partisë Demokratike. Në mbledhjen që zhvilloi Komisioni për çështjet Europiane në datën 29 gusht, opozita e bojkotoi me pretekstin se ishte jashtë sesionit parlamentar dhe se ishte antikushtetues.
“Asnjë nga deputetët që sot kanë thirrur mbledhjen nuk janë të rizgjedhur dhe nuk e kanë legjitimitetin të thërrasin mbledhje jashtë sesioni”, shprehej deputetja e zgjedhur Jorida Tabaku.
Ndërkoh kolegu i saj bëri të njëjtën gjë sot, lëshon shkresa me logon e Kuvendit dhe në emër të një grupi deputetësh që ende nuk janë betuar në parlament.
Nuk përjashtohet mundësia që veprimi i tij të jetë një mesazh për Sali Berishën, për t’i treguar se nëse i jep sërish drejtimin e grupit, Bardhi është i gatshëm të marrë përsipër betejat politike.
Megjithatë, ai duhet të sqarojë arsyen pse dokumenti i dërguar në emër të grupit parlamentar të PD-së është pa vulë.
