Kreu i grupit parlamentar të Partisë Demokratike, Gazment Bardhi, ka reaguar ashpër ndaj asaj që e konsideroi si një “skenar të mazhorancës” për të mos lejuar zhvillimin e debatit në Kuvend.
Duke folur për gazetarët jashtë sallës plenare, Bardhi akuzoi kryetarin e grupit parlamentar të PS, Taulant Balla, se ka urdhëruar deputetët socialistë të ndërpresin diskutimet, duke dalë “zbuluar” përmes një mesazhi të dërguar gabimisht në një grup WhatsApp.
“Skenari ishte përgatitur prej kohësh. Taulant Balla, duke ngatërruar grupet, urdhëroi të gjithë deputetët e PS të hyjnë në sallë për të ndërprerë debatet. Duan ta kthejnë Kuvendin në memec, por ta harrojnë këtë,” deklaroi Bardhi.
Ai shtoi se opozita do të reagojë sa herë të shkelet rregullorja, duke paralajmëruar se nuk do të lejojnë mbylljen e fjalës në Parlament.
