VNA ka siguruar një nga letrat që Gazment Bardhi u ka dërguar ambasadave dhe përfaqësive ndërkombëtare në Tiranë, ku opozita denoncon atë që e konsideron “dhunim të opozitës”, shkelje të standardeve demokratike dhe tentativa për kontroll politik të Kuvendit.
Letra, e firmosur nga Bardhi si kryetar i grupit parlamentar të PD-së, i drejtohet ambasadorëve të SHBA-së, Bashkimit Evropian, OSBE-së dhe vendeve të BE-së në Shqipëri.
Në dokument, opozita kundërshton ndryshimet në rregulloren e Kuvendit dhe mënyrën se si, sipas saj, mazhoranca po merr vendime pa konsensus me opozitën. Bardhi pretendon se socialistët po minojnë bashkëjetesën parlamentare dhe po përdorin shumicën për të kontrolluar komisionet dhe proceset parlamentare.
Në një tjetër pjesë të letrës, ai ndalet edhe te prania e Gardës në Kuvend, duke pretenduar se deputetët e opozitës janë intimiduar dhe penguar në ushtrimin e funksioneve të tyre parlamentare.
Madje, në tekst përdoret edhe një krahasim ekstrem me Korenë e Veriut, ndërsa opozita kërkon ndërhyrjen dhe vëmendjen e partnerëve ndërkombëtarë për situatën politike në Shqipëri.
Pavarësisht toneve alarmante të letrës, as nga Niko Peleshi (që është i akuzuari më i madh në atë letër) dhe as mazhoranca nuk ka pasur ndonjë reagim publik lidhur me këto akuza të opozitës.
Të shohim nëse edhe pergjigjen për ambasadat ja kanë dhënë t'ua shkruajë Gazi.
