Gazetarja Esiona Konomi ka denoncuar se Kuvendi i Shqipërisë kishte fshirë apo fshehur të gjithë dokumentacionin parlamentar nga faqja zyrtare, duke kufizuar aksesin publik në aktet e depozituara. Ajo u shpreh se deri dy ditë më parë çdo dokument ishte i dukshëm në seksionin “Dokumentacion”, ndërsa më pas ishte bërë i paarritshëm.
Sipas Konomit, shpjegimet jozyrtare të Kuvendit për vendosjen e “filtrave kërkimi” ishin të pabindshme dhe përbënin një hap prapa në transparencë.
Megjithatë, pas komunikimeve të saj me stafin përgjegjës, dokumentet janë rikthyer në faqen e Parlamentit, duke u bërë sërish të aksesueshme për publikun.
Denoncimi i gazetares Esiona Konomi:
Kuvendi i Shqipërisë ka fshirë/fshehur të gjithë dokumentacionin parlamentar. Deri para dy ditësh, çdo akt i depozituar në Kuvend, shfaqej këtu, tek Dritarja "Dokumentacioni" dhe nënndarja "Dokumentacion".
Arsyet e kësaj manovre, nuk i di. Shpjegimet jo zyrtare të Kuvendit, se kanë vendosur filtra për të kërkuar diçka konkrete, janë jo bindëse. Unë nuk kam nga t'a di çfarë është depozituar nëse nuk më shfaqet këtu. Rrjedhimisht nuk kam si të aplikoj filtra për të kërkuar një akt. Është mirë që Parlamenti të bëjë ndonjë hap drejt lehtësimit, dhe jo përkeqësimit të transparencës.
Pas komunikimit në vijim me stafin përgjegjës të Kuvendit, dokumentet rikthehen në faqen e Parlamentit, siç ishin më parë.
