Kryetari i grupit parlamentar të Partisë Demokratike, Gazment Bardhi, ka vlerësuar sot punën e SPAK, veçanërisht në hetimin për tunelin e Llogarasë dhe rolin e zv.kryeministres Belinda Balluku. Në një konferencë për media, Bardhi deklaroi se në dosje ndodhen komunikime përmes mesazheve midis Ballukut dhe Evis Berberit, në lidhje me anulimin e tenderit për tunelin e Llogarasë.
Ai shtoi se dosja e ministres së Infrastrukturës, e cila tashmë është marrë e pandehur nga SPAK, “ekspozon mënyrën se si funksionon shteti i Edi Ramës”.
“Rama tentoi të trajtonte edhe funksionimin e Bashkimit Europian njëlloj siç trajtoi tunelin e Llogarasë, duke menduar se mund të ndryshojë rregullat e demokracisë europiane sipas interesave të tij politik, siç bëri me kriteret e tenderit për tunelin e Llogarasë. Dosja e Ballukut ekspozon mënyrën se si funksionon shteti i Edi Ramës”, u shpreh Bardhi.
Sipas tij, përgjegjës për këtë aferë është edhe vetë kryeministri Rama, i cili nuk ka dhënë ende asnjë koment publik për çështjen. “Qetësia e tij, heshtja totale, është tregues i përfshirjes. Sot shqiptarët shohin qartësisht se kjo nuk është një histori individuale, por pjesë e një modeli qeverisjeje,” tha Bardhi.
Ai e cilësoi si të domosdoshme që drejtësia të veprojë deri në fund, ndërsa PD do të vijojë të ndjekë nga afër procesin dhe të kërkojë përgjegjësi politike për këtë çështje.
