Fushata elektorale për zgjedhjet lokale të 9 nëntorit ka nisur zyrtarisht të shtunën. 13 kandidatë për kryetarë në pesë bashki të vendit kanë gjashtë ditë kohë, deri në heshtjen zgjedhore të së shtunës së ardhshme, për të kërkuar votën e mbi 308 mijë qytetarëve që do të thirren për të votuar.
Në zgjedhje do të jenë të përfshira dy bashki qendra qarqesh, Vlora dhe Berat, dhe tre bashki më të vogla: Tepelena, Cërriku dhe Mati. Partia Demokratike dhe opozita nuk kanë kandidatë të regjistruar zyrtarisht nën siglën e tyre, por kanë shprehur mbështetje për disa emra të pavarur që do të sfidojnë kandidatët socialistë dhe disa të tjerë.
Në Vlorë, Brunilda Mersini e PS, e cila la mandatin e deputetes për t’u kandiduar për kryebashkiake, do të përballet me dy kandidatë demokratë, duke përfshirë Dionis Sotën, mbështetur nga PD, dhe Gjergj Nikën, anëtar i Këshillit Bashkiak nën siglën e Parisë Demokratike. Në Berat, kandidati i PS, Ervin Ceca, do të garojë kundër Pavlo Shkarpës.
Në Mat do të ketë një garë treshe: Altin Bojni për PS, Suzana Pasha, ish-kryetarja e Gruas së PS lokale, e cila kandidoi si e pavarur duke sfiduar propozimin e Ramës, dhe Eduart Brahilika, i mbështetur nga PD dhe opozita. Në Cërrik, Florenc Doka i PS do të përballet me kandidatin e pavarur Amarildo Hoxha, i mbështetur nga PD e Berishës, si dhe me Eligert Himën nga partia ‘Lëvizja Shqipëria Bëhet’.
Në Tepelenë, PS propozon Gramoz Sakon, ndërsa opozita mbështet të pavarurin Gabriel Guma. Mandati i kryebashkiakëve të rinj do të jetë një vit e gjysmë, deri në zgjedhjet lokale të pranverës së vitit 2027.
