Është mbajtur sot në Tiranë takimi i 20-të i Komitetit Parlamentar të Stabilizim-Asociimit Shqipëri – Bashkimi Evropian, ku u diskutuan çështje të integrimit dhe respektimit të standardeve evropiane në vend.
Në këtë tryezë ishte i pranishëm edhe eurodeputeti i Greqisë, Fredi Beleri, i cili foli në gjuhën greke dhe artikuloi një sërë kritikash ndaj Shqipërisë. Ai tha se vendit “i duhet një universitet grek”, ndërsa ngriti shqetësime për mënyrën se si mësohet gjuha greke në disa shkolla shqiptare.
“Ende nuk ka një universitet grek në Shqipëri. Në disa shkolla ku mësohet gjuha greke ka pasur shumë probleme, veçanërisht me tekstet mësimore që përmbajnë elementë iredentistë dhe përmbajtje të papranueshme në kushte të caktuara”, tha Beleri.
Ai foli edhe për çështjen e lirisë fetare, duke theksuar se “edhe pse Shqipëria ka bërë progres të dukshëm dhe një bashkëjetesë harmonike mes feve, problemi kryesor mbetet kthimi i pronave të institucioneve fetare, proces që ka nisur pas 70 vitesh”.
Në fjalën e tij, eurodeputeti grek u ndal edhe tek reforma territoriale, duke e cilësuar ndarjen e re të Himarës si “të papërshtatshme me përbërjen demografike dhe etnike të zonës”.
“Të drejtat e njeriut nuk lidhen vetëm me pakicat, por me të gjithë qytetarët shqiptarë”, përfundoi ai.
