Forumi për Dialogun Politik është një iniciativë e re e drejtuar nga Ermal Hasimja, e cila synon të kanalizojë energjitë e opozitës në një front të vetëm përballë qeverisë.
Në një konferencë për shtyp, Hasimja deklaroi se iniciativa do të nisë së shpejti takimet me partitë politike opozitare, pa dallime ideologjike. Sipas tij, fragmentarizimi i opozitës ka dobësuar ndikimin e saj politik dhe ka çuar në shpërdorimin e energjive opozitare.
“Energjitë e shpërndara duhet të bashkohen,” u shpreh Hasimja, duke përjashtuar mundësinë që kjo nismë të shndërrohet në një parti politike.
Ai theksoi se qëllimi i vetëm i Forumit është bashkimi i forcave opozitare dhe krijimi i një hapësire bashkëpunimi mes partive, organizatave dhe individëve me peshë elektorale. Tryeza, sipas tij, do të jetë e hapur për të gjithë aktorët që synojnë forcimin e opozitës dhe ndërtimin e një qëndrimi të përbashkët politik.
