Kryetari i Grupit Parlamentar të Partisë Demokratike, Gazment Bardhi, ka akuzuar nga foltorja e Kuvendit qeverinë për abuzim me fondet IPARD, të dhëna nga Bashkimi Europian për mbështetjen e bujqësisë në Shqipëri.
Bardhi deklaroi se ka në dispozicion një listë me emra kryebashkiakësh dhe deputetësh të Partisë Socialiste, të cilët, sipas tij, kanë përfituar në mënyrë të paligjshme fondet e destinuara për fermerët shqiptarë, duke i kaluar ato në duart e familjarëve të tyre.
Ai njoftoi se Partia Demokratike do të dorëzojë brenda javës një kërkesë zyrtare për ngritjen e një Komisioni Hetimor parlamentar, me qëllim zbardhjen e kësaj çështjeje.
“Mocioni ishte për fermerët dhe foli këtu vetëm 5 minuta për fermerët. Taulanti nuk flet dot për për fondet e IPARD dhe fermerët. Dilni këtu dhe shpjegoni pse nuk doni të flisni pse BE ka bllokuar mln euro që shkojnë për fermerët shqiptarë. Ne jemi i vetmi vend që na janë bllokuar fondet sepse kjo qeveri ka vjedhur edhe paratë e taksapaguesve europianë.
Brenda javës do të depozitojmë kërkesë për të ngritur Komision Hetimor për këtë çështje. Do verifikojmë se si babai i i Suel Çelës mori paratë e fermrëve shqiptarë. Nuk i mori lekët fermeri i Elbasanit por i mori babai i Suel Çelës. Një njeri i shpallur në kërkim. Ne nuk donim të bënim politik mbi këtë çështje, por ne kemi për detyrë të reflektojmë të diskutojmë dhe të nxjerrim në përgjegjësi se si besimi i institucioneve europiane është shkelur nga qeveria.
Unë kam një listë të gjatë se si kryetarët tuaj të bashkive, si si familjarët të deputetëve të PS kanë marrë fondet e IPARD, kanë marrë djersën dhe mundin e fermerëve. Kërkojmë të ngremë Komision të Posaçëm, për t’i garantuar BE që paratë e IPARD 3 nuk do vidhen”, tha Bardhi.
