Partia Demokratike zhvilloi Foltoren e radhës para Kryeministrisë, këtë herë në mungesë të Sali Berishës, i cili ndodhet në Strasburg.
Foltorja që zgjati vetëm 26 minuta, fjalën kryesore para mbështetësve që ishin më pak se ato të mëparshmet, e pati deputeti Belind Këlliçi, i cili foli për protestën kombëtare që u mbajt para dy ditësh.
Sipas tij, tubimi i së shtunës ka tronditur themelet e qeverisë dhe i ka futur frikën kryeministrit Edi Rama.
“Protestë e jashtëzakonshme që tronditi themelet e pushtetit. Dy netë më parë narko-shteti dëshmoi se është më i dobët se kurrë. Me dhunë që buron nga humbja e kontrollit, nga frika dhe paranoja e fundit të pashmangshëm. I ka hyrë frika në palcë, çarja e madhe ka filluar. Frika me metoda mafioze është kthyer mbrapsht. Një pushtet kriminal nuk përdor dhunën vetëm për shpërndarje por edhe për të qetësuar veten. Dhuna ka qenë programi i sektit që kur erdhën në pushtet”, tha deputeti.
Këlliçi kërkoi gjithashtu lirimin e të arrestuarve pas protestës, ndërsa paralajmëroi se ditën e nesërme do të shkojnë me një grup mbështetësish në Gjykatën e Tiranës për të kërkuar lirimin e tyre.
