Florian Haçkaj ka reaguar me tone të forta në rrjetet sociale, duke kritikuar ata që kanë shfaqur admirim për ish kryeministrin Fatos Nano pasi ky i fundit ndodhet në gjendje të renduar shëndetësore.
Në një status të shoqëruar me foton e vilës së stërgjyshit të tij, Eqerem Zeqja, në Tiranë, Haçkaj ka kujtuar historinë e familjes së tij, që sipas tij u persekutua dhe iu konfiskua prona nga regjimi komunist në vitin 1948.
“Kjo në foto është shtëpia e stërgjyshit tim, Eqerem Zeqja! Një vilë e mrekullueshme e ndërtuar me djersë e shumë punë, të cilën e pushtuan të babëziturit komunistë në vitin 1948. Në atë ditë të urryer, gjyshja ime e ndjerë u kthye në shtëpi dhe gjeti pak plaçka e mobilje të ngarkuara në një kamion, bashkë me familjarët që u dëbuan pas torturave ndaj stërgjyshit tonë,” shkruan Haçkaj.
Ai shton se në vitin 1951 në këtë vilë u vendos familja Nano dhe aty lindi Fatos Nano në vitin 1952. Sipas tij, prona mbeti në duart e familjes Nano deri në fund të viteve ’90, ndërsa çdo përpjekje për ta rimarrë pas rënies së komunizmit është përballur me kërcënime e arrogancë.
“Kjo është trashëgimia e komunizmit: grabitje, dhunë, internime dhe padrejtësi që vazhdojnë të rëndojnë ndër breza,” shkruan Haçkaj, duke shtuar se ndien “vetëm një keqardhje — që Nano dhe të tjerë si ai nuk morën kurrë dënimin që meritonin për të kaluarën komuniste dhe për ruajtjen e strukturave të vjetra nën petkun e demokracisë.”
Në përfundim, ai thekson:
“Një popull që harron historinë e tij, është i destinuar ta përjetojë përsëri atë.”
https://www.facebook.com/share/p/1J1BDh6KgL/?mibextid=wwXIfr
