Kandidati i pavarur për bashkinë e Tiranës, Florian Binaj, zhvilloi sot një takim me përfaqësues dhe koordinatorë të partive opozitare që kanë shprehur mbështetjen për kandidaturën e tij. Në një prononcim për mediat pas takimit, ai theksoi se ky ishte vetëm hapi i parë në një seri takimesh që do të pasojnë për të koordinuar fushatën.
“Sot u zhvillua takimi i parë me përfaqësuesit dhe koordinatorët e partive të opozitës. Ishte një takim shumë i frytshëm dhe besoj se është i pari nga shumë të tjerë që na presin në ditët në vijim,” u shpreh Binaj.
Ai bëri të ditur se është duke punuar për programin elektoral me një grup ekspertësh të pavarur, duke theksuar se nuk do të nxitohet për ta publikuar, pasi synon një dokument serioz dhe gjithëpërfshirës për qytetarët.
“Gjërat për t’u bërë mirë duan kohë. Kur të jetë gati, do ta bëjmë publik dhe do t’ua prezantojmë qytetarëve të Tiranës,” shtoi ai.
Binaj u ndal edhe te marrëdhënia me drejtuesit e partive opozitare, duke theksuar se nuk ka zhvilluar ende takime me asnjërin prej tyre, por është i gatshëm ta bëjë në çdo moment. Megjithatë, ai qëndroi deklaratës së tij se nuk do të shfaqet në takime elektorale krah kryetarëve të partive.
“Nuk kam folur me zotin Berisha dhe kam thënë që në daljet në terren, në fushatë do jenë pa përfaqsimin e kryetarëve, por absolutisht jam i gatshëm të takojë çdo kryetar të partive të opozitës” deklaroi ai.
Duke iu përgjigjur komenteve se është i varur nga Partia Demokratike, Binaj u shpreh: “Jam një kandidat i pavarur, i mbështetur nga të gjitha partitë e opozitës. Dhe në qoftë se ju e shihni si një lloj varësie faktin që mbështetja vjen jo vetëm nga PD, por nga të gjtha partitë e tjera, po jam i varur edhe nga partia Mundësia, jam i varur nga partia Nisma Thurrje, nga Shqipëria Bëhet dhe nga partia Agrare.”
