Kandidati për kryetar bashkie në Tiranë, Florian Binaj, ka reaguar sot ndaj deklaratave të kryeministrit Edi Rama në podcastin “Flasim”, ku ky i fundit e quajti “një zgjedhje të dëshpëruar të opozitës” dhe “aktor humori në rolin e kandidatit të pavarur”.
Në reagimin e tij, Binaj u shpreh me tone ironike:
“Aktori më i madh në Shqipëri është Edi Rama, që u merr 140 milionë euro qytetarëve duke ‘i bindur’ se po bën incenerator pa vënë asnjë tullë! Prestigjator!”
Ky është reagimi i parë politik i Florian Binajt ndaj një akuze direkte nga kryeministri, ndërsa procesi zgjedhor për Bashkinë e Tiranës ende nuk ka një datë të shpallur zyrtarisht.
Rama shtoi se kandidatja e Partisë Socialiste, Ogerta Manastirliu, është “drejtuesja e duhur për Tiranën”, duke theksuar se “banorët e kryeqytetit do të dinë të zgjedhin seriozitetin përballë spektaklit”.
Polemika mes kryeministrit dhe kandidatit të opozitës sinjalizon nisjen e një fushate që pritet të jetë e mbushur me ironi dhe përplasje të forta publike, edhe pse data e zgjedhjeve mbetet ende e paqartë.
