Fatmir Xhafaj duket se po kërkon të zgjerojë ndikimin e tij mbi buxhetet e organeve të drejtësisë dhe Komisionit të Ligjeve duke hyrë në një territor që tradicionalisht i takon Ministrisë së Financave dhe Komisionit të Ligjeve.
Pas njoftimeve zyrtare që institucionet e drejtësisë kanë marrë për organizimin e seancave dëgjimore mbi buxhetin e vitit 2026 nga Komisioni i Ligjeve, Xhafaj ka ndërhyrë duke kërkuar që edhe Komisioni për Nismat Qytetare, Bashkëpunimin dhe Mbikëqyrjen Institucionale të marrë të dhënat nga këto institucione.
Deputeti socialist, në cilësinë e kryetarit të Komisionit për Nismat Qytetare, Bashkëpunimin dhe Mbikëqyrjen Institucionale, u ka kërkuar institucioneve të drejtësisë që t’i përcjellin materialet e kërkesave buxhetore edhe pranë këtij komisioni, paralelisht me Komisionin e Ligjeve.
Sipas rregullores së Kuvendit, kompetenca për mbledhjen dhe shqyrtimin e materialeve që lidhen me buxhetet e organeve të drejtësisë i takon vetëm Komisionit të Ligjeve, i cili është komisioni përgjegjës për këtë fushë. Të gjitha kërkesat për buxhet janë depozituar prej kohësh pranë këtij komisioni, por pasditen e djeshme një email i ri nga zyra e Xhafajt ka kërkuar që të njëjtat dokumente t’i dërgohen edhe pranë Komisionit për Nismat Qytetare, Bashkëpunimin dhe Mbikëqyrjen Institucionale.
Rrallëherë ka ndodhur që institucionet të dërgojnë në mënyrë të shumëfishtë materiale, akte apo dokumentacion në çdo komision që shfaq interes për to. Procedura parlamentare parashikon se vetëm Komisioni i Ligjeve mund t’i përcjellë për mendim materialet në komisionet e tjera, nëse e gjykon të arsyeshme.
Mbetet për t’u parë nëse institucionet e drejtësisë do t’i përgjigjen kërkesës së Xhafajt, apo do të ndjekin praktikën ligjore ekzistuese, duke sqaruar se materialet janë dorëzuar pranë komisionit përgjegjës — atij të Ligjeve. Në çdo rast, nisma e Xhafajt shihet si përpjekje për të ushtruar ndikim dhe për të marrë një rol të dytë mbikëqyrës mbi buxhetet e drejtësisë, në një fushë ku kompetencat janë të përcaktuara qartë.
