Vendimi i sotëm i Gjykatës Kushtetuese do të thotë se përplasja mes qeverisë dhe drejtësisë nuk është mbyllur, por është shtyrë për një ballafaqim të plotë institucional. Më 21 janar 2026, në një seancë publike, përfaqësues të SPAK, GJKKO, Kryeministrisë, Presidencës dhe Kuvendit, përmes juristëve të tyre, do të paraqesin argumentet pro dhe kundër.
Gjykata Kushtetuese do të interpretojë nenin 103 të Kushtetutës dhe do t’i japë përgjigje pyetjes thelbësore: a duhet të pezullohet nga detyra një anëtar i kabinetit qeveritar në momentin kur është nën hetim nga SPAK. Ky është thelbi i konfliktit mes pushtetit ekzekutiv dhe sistemit të drejtësisë. Kryeministri shkon edhe më tej, duke pretenduar se GJKKO ka cenuar kompetencat e Presidentit dhe të Kuvendit.
Vendimi i sotëm nuk i afekton hetimet e SPAK. Hetimet ndaj Ballukut vijojnë dhe ajo mbetet zyrtarisht e pandehur për dyshimet mbi tenderimin e tunelit të Llogarasë dhe favorizimet në procedurat e prokurimit.
