Kryeministri Rama, në një intervistë për Times Radio Politics, iu kundërpërgjigj Nigel Farage pas deklaratave të këtij të fundit për shqiptarët në Britani.
Rama e quajti “marrëzi” pretendimin e Farage se “1 në çdo 50 shqiptarë në Britani është në burg” dhe tha se shifrat e vërteta tregojnë të kundërtën.
“Numrat dhe shifrat tani janë bërë më shumë çështje opinioni dhe emocioni… numri i shqiptarëve që futen ilegalisht ka rënë në nivele të papërfillshme. Nuk ekziston diçka e tillë,” u shpreh Rama.
Duke iu përgjigjur narrativës së Farage për sigurinë, ai shtoi:
“Nëse kjo është qasja e Mbretërisë së Bashkuar, atëherë ku do t’i gjeni njerëzit për të ndërtuar shtëpitë tuaja, kush do t’ju shërbejë kafen, kush do të jenë taksistët dhe shoferët tuaj?”
Kryeministri Rama e ftoi sërish Farage që të vizitojë Shqipërinë:
“Nuk është thjesht një vend i bukur, është vendi më i bukur… ka ende shumë natyrë të pa shkatërruar dhe shumë nga Europa e Mesme siç ishte dikur. Jam i bindur se si konservator, zoti Farage do ta pëlqejë shumë.”
Ndërkohë, Farage disa ditë më parë kishte deklaruar para anëtarëve të Reform UK se takimi me Ramën “do të përfshijë edhe mundësinë e transportit të një ngarkese me persona të dënuar, ndoshta edhe me një avion shumë të madh”. Ai shtoi se qëllimi i tij është “të deportojmë kriminelë të huaj. Do të ndalojmë anijet dhe do t’i dërgojmë mbrapsht ata që hyjnë ilegalisht në vendin tonë”.
