“Detyra jonë është e qartë: të ndërtojmë një sistem shëndetësor ku mjekët, studiuesit dhe studentët shqiptarë të udhëheqin inovacionin këtu në vendin tonë; ku spitalet tona të bëhen qendra ekselence; dhe ku pacientët tanë të marrin kujdes të barabartë me standardet më të larta ndërkombëtare”, deklaroi sot ministrja e Shëndetësisë, Evis Sala, në Kongresin e Dytë Ndërkombëtar të Shkencave Mjekësore.
Deklarata që tingëllojnë si një udhëtim ëndrrash drejt një sistemi shëndetësor të së ardhmes që duket se e kemi shumë pranë… në fjalime.
Sepse ndërsa flitet për spitale që do të udhëheqin inovacionin dhe për standarde ndërkombëtare, realiteti i përditshëm i sistemit shëndetësor shqiptar vazhdon të jetë pak më “tokësor”: mungesa bazike, vonesa, radhë të gjata dhe pacientë që testojnë durimin në radhët e pritjes.
Natyrisht, vizioni është i rëndësishëm. Por para se të mbërrijmë te inteligjenca artificiale në spitale dhe qendrat ekselence, ndoshta hapi i parë mbetet pak më modest, ilaçe që mos të mungojnë në spitale, të ketë analiza në çdo kohë, infrastrukturë të përmirësuar dhe korridore që nuk mbajnë radhët e gjata të pacientëve.
Deri atëherë, ndoshta do të duhen dhe shumë dalje publike të ministres me deklarata për standarde ndërkombëtare, dhe shumë koleksione syzesh të reja që zonja Sala na i prezanton në konferencat e saj.
