Sekretariati për Procedurat, Votimet dhe Etikën u mblodh sot për të shqyrtuar kërkesën e Partisë Socialiste, e cila kërkonte vendosjen e një mase disiplinore ndaj kreut të Partisë Demokratike, Sali Berisha.
Pas diskutimeve, Sekretariati vendosi që Berisha të përjashtohet për 10 ditë nga punimet e Kuvendit. Kjo masë erdhi pas kërkesës së Grupit Parlamentar të Partisë Socialiste, i cili kishte propozuar një përjashtim prej 30 ditësh, pas deklaratave të Berishës në lidhje me qëndrimin e ambasadorit të Bashkimit Europian në Tiranë, Silvio Gonzato, ndaj ligjit për barazinë gjinore.
Disa orë para se ligji për barazinë gjinore të votohej në Kuvend, kreu i PD tha se nuk vjen si direktivë e Bashkimit Europian, ndryshe nga ç'kishte deklaruar më parë ambasadori i BE-së. Berisha tha se ambasadori nuk mund t’i impononte shoqërisë shqiptare "standarde të përkatësisë së shumëfishtë gjinore".
“Ambasadorit të BE i them kaq, zotëri ne absolutisht ne respektojmë orientimin seksual të gjithsecilit, por përpjekjet tua për t’i imponuar shoqërisë shqiptare standarde të përkatësisë së shumëfishtë gjinore, të gjinisë në diversitet të gjerë, përveç asaj binare, dhe i them këtu, edhe në statusin tënd je binar. Nuk merremi ne me trajtimin, ka fëmijë, ka pasur grua, ka marrë vendimet e tij më pas, siç e ka shpjeguar, se nuk dua të merrem me jetën e tij personale fare. Kështu që ligji nuk ka asgjë të përbashkët. Le t’u thotë shqiptarëve se cila direktivë e BE bën fjalë për përkatësi të shumëfishtë gjinore. Të dalë, ta nxjerrë aty”, tha Berisha.
Vendimi pritet të formalizohet në seancën plenare të ardhshme, ndërsa përjashtimi 10-ditor i Sali Berishës nga punimet e Kuvendit hyn në fuqi menjëherë pas miratimit.
