Një ditë pas shtyrjes së mbledhjes së Këshillit të Mandateve, pesë anëtarët e Partisë Demokratike në këtë Këshill dalën sot përpara mediave për të kërkuar thirrjen e menjëhershme të seancës së radhës.
Sekretari i Përgjithshëm i PD, Gazment Bardhi, theksoi se kjo është hera e parë që një mbledhje e Këshillit të Mandateve shtyhet pa caktuar një datë të re dhe i bëri thirrje kryetarit Niko Peleshi të zbatojë ligjin dhe rregulloren.
“Po tentohet të zvarritet ngjarja. Këshilli i Mandateve është mbledhur gjithmonë brenda 48 orësh. Dje morëm dosjen e plotë nga Prokuroria. Për pesë herë gjatë mbledhjes u tentua të intimidohen prokurorët, por dua të vlerësoj integritetin e tyre”, deklaroi Bardhi.
Ai shtoi se PD ka kërkuar mbledhjen për të martën në orën 11:00, duke theksuar rëndësinë e dëgjimit të argumenteve dhe mbrojtjes së të pandehurës Belinda Balluku.
“Bëj thirrje kryetarit të Kuvendit të zbatojë ligjin dhe rregulloren, të thërrasë mbledhjen e Këshillit në fillim të javës dhe Prokuroria të mund të kryejë veprimet e mëtejshme”, theksoi ai.
Sipas Bardhit, Rama kërkon të marrë kohë për veten e tij, pasi ishte vetë ai që prezantoi ministren Balluku me kompaninë turke, e cila më pas fitoi kontratën pa procedura dhe në shkelje të plotë të ligjit.
“Nuk ka shqiptar që nuk e di se Belinda Balluku nuk e identifikoi e vetme, pa porosi dhe pa urdhër të Edi Ramës, kompaninë turke për ndërtimin e tunelit,” theksoi ai.
Ai përfundoi me një thirrje ndaj kryeministrit Edi Rama, që të heqë dorë nga çdo tentativë për të penguar drejtësinë.
