Erion Veliaj ka reaguar për herë të parë pas shkarkimit të tij me vendim të këshillit bashkiak dhe qeverisë nga posti i kryebashkiakut të Tiranës. Në një status të gjatë në Facebook, Veliaj shmang të komentojë drejtpërdrejt vendimin e socialistëve, të cilët kanë nisur tashmë zyrtarisht procesin për zëvendësimin e tij. Në vend të kësaj, ai zgjedh të merret me deklaratat e italianit Gabriele Tarroni Longinotti, i cili ka përgënjeshtruar akuzat që kishte bërë më parë në media për të në lidhje me inceneratorin.
Veliaj e interpreton përgënjeshtrimin e Longinottit si një provë se gjithçka ka qenë një kurth i ngritur ndaj tij dhe familjes së tij. Dhe këtë “zbardhje” ai e ofron edhe për ata që, sipas tij, me shumë “zell politik” u bënë pjesë e kësaj loje. Pa përmendur emra, por me gishtin dukshëm nga brenda radhëve të veta që po i japin goditjen e fundit, Veliaj u kujton se është “i burgosur, por nuk është në burg”.
“Për të tjerët, që u bënë me vetëdije apo me zell politik pjesë e këtij fabrikimi. Dua t’u them se unë jam i burgosur, por nuk jam në burg. Jam i qetë dhe i çliruar në ndërgjegjen time. Shpresoj që të keni fuqi të çliroheni nga burgu i ligësisë suaj ku keni mbyllur veten, pasi e vërteta e rrëfimi do t’ju bëjë të lirë”, shkruan Veliaj.
Megjithatë, ndërsa e zhvillon betejën ligjore për të mbajtur karrigen e Bashkisë, Veliaj ende nuk ka gjetur kurajon për të folur hapur për “padrejtësinë” që pretendon se po i bëhet. Dhe këtë, kryebashkiaku në largim vazhdon ta shmangë me po aq kujdes sa shmang edhe fjalinë “më shkarkoi partia ime.”
