Ish-kryebashkiaku i Tiranës, Erion Veliaj, ka lënë sot qelinë e paraburgimit për herë të parë që prej 10 shkurtit, ditës kur u arrestua me urdhër të Prokurorisë së Posaçme (SPAK).
Veliaj u transportua me furgonin e Drejtorisë së Burgjeve nga paraburgimi i Durrësit drejt Tiranës, nën masa të rrepta sigurie. Ai mbërriti në ambientet e Gjykatës Kushtetuese pak para orës 9:00 të mëngjesit, ku do të shqyrtohet ankimi i tij kundër vendimit për shkarkimin nga detyra si kryebashkiak i Tiranës.
Në hyrje të godinës së gjykatës, Veliaj u shfaq me pranga, por i qetë dhe i qeshur, ndërsa për një moment iu drejtua gazetarëve të pranishëm përpara se të hynte në sallën e seancës.
