Në një intervistë për News24 me Nisida Tufën, deputeti socialist Erion Braçe pranoi hapur se marrëdhënia e tij me kryeministrin Edi Rama nuk është aspak e mirë. Braçe zgjodhi t’i shfaqë pakënaqësitë e tij publikisht, duke e pranuar se “nuk flasin” prej kohësh — një pauzë komunikimi që sipas tij shërben për “reflektim”.
Në intervistë, Tufa e pyeti drejtpërdrejt për historikun e marrëdhënies së tij me Ramën, dhe Braçe nuk e shmangu.
Erion Braçe: “Jo tani nuk flasim. Unë mendoj se duhet të ketë gjithmonë një pauzë për të reflektuar secili në këtë marrëdhënie, që është politike, pune dhe marrëdhënie njerëzore në fund, unë kam bindjet e mia dhe nuk dua që të më cënohen kufijtë që unë ngre. Jam i prirur përkundrejt një ekuilibri, por kur kam të drejtë kam të drejtë dhe të drejtën time nuk e negocioj me kërrkënd.
Nëse unë thashë publikisht që duhet pritur vendimi i Gjykatës Kushtetuese sa i takon shkarkimit të zotit Veliaj apo shpalljes së zgjedhjeve në Tiranë, me këtë vendimin e Kushtetueses rezulton se paskam patur të drejtë. Por dhe me gjithçka që po pason si ligjërim, unë s’kam folur pas vendimit të Kushtetueses.”
Deklarata e Braçes vjen pikërisht në momentin kur vendimi i Gjykatës Kushtetuese për çështjen e Tiranës ka vënë në pozitë të vështirë kryeministrin, ndërsa Braçe duket se kërkon të nënvizojë se ai “kishte paralajmëruar” këtë skenar.
Sa i përket ngrirjes së komunikimit me Ramën, ai la të nënkuptohet se situata mund të ndryshojë, por “pas disa muajsh”.
