Deputeti i partisë Mundësia, Erald Kapri, ka deklaruar në një intervistë për News 24 se nuk ka asnjë mundësi bashkëpunimi me opozitën aktuale, pas thirrjes së Sali Berishës për t’u bërë bashkë kundër qeverisë së Edi Ramës.
Kapri theksoi se partia e tij nuk mund të ulet në një tryezë ku ndodhen figura të akuzuara për korrupsion, duke përmendur konkretisht Sali Berishën dhe Ilir Metën, si edhe dosjen “Partizani” ndaj kryedemokratit. Sipas tij, mungesa e besueshmërisë së lidershipit opozitar është arsyeja kryesore pse protestat, edhe pse masive, nuk kanë prodhuar rezultat politik.
Ai nënvizoi se lufta kundër korrupsionit është problemi kryesor i shqiptarëve dhe se pikërisht për këtë qëndrim partia Mundësia ka marrë rreth 50 mijë vota. Kapri shtoi se, ndonëse edhe ata kanë si synim rrëzimin e qeverisë, kjo nuk mund të bëhet duke u bashkuar me aktorë që, sipas tij, synojnë të godasin drejtësinë për të shpëtuar karriget e tyre politike.
“Protesta është një mjet i mirë për të ngritur zërin, por pa besueshmëri nuk rrëzohet qeveria. Janë bërë protesta edhe më të mëdha dhe nuk kanë dhënë rezultat. Duhet ndryshim i lidershipit. Në këto kushte, ne nuk mund të shkojmë në tryezë”, u shpreh Kapri.
