Pedagogia dhe studiuesja Enriketa Papa ka reaguar ashpër pas vendimit të Kuvendit të Shqipërisë për ta cilësuar Enver Hoxhën si “personalitet kombëtar” për muajin tetor 2025.
Ajo thekson se ky vlerësim është mbështetur në Fjalorin Enciklopedik Shqiptar të vitit 2008, ku pjesa për Enver Hoxhën është hartuar nga historiani Xhelal Gjeçovi.
Sipas Papës, vetë Akademia e Shkencave ka gabuar që në atë botim ka përfshirë një zë të veçantë për diktatorin, me tone që relativizojnë krimet e regjimit komunist.
Ajo nënvizon se në fjalor theksi është vendosur tek jeta politike dhe dekoratat e Hoxhës, ndërsa mungon analiza e sistemit stalinist që ai ngriti.
“Jam pa fjalë”, përfundon Papa, duke e cilësuar aktin si skandal institucional dhe fyerje për viktimat e diktaturës.
Postimi i plotë i Enriketa Papa:
Duke lexuar faqet e Fjalorit Enciklopedik Shqiptar, botuar në vitin 2008, rezulton se pjesën mbi Enver Hoxhën e ka hartuar historiani Xhelal Gjeçovi. Pikërisht kësaj përmbledhjeje i është referuar Kuvendi i Shqipërisë, për ta cilësuar diktatorin si “personalitet kombëtar” për muajin tetor 2025.
Por akoma skandaloz, duket se është edhe fakti, që në vitin 2008 Akademia e Shkencave e Shqipërisë ka arsyetuar të nevojshme, që të botonte në këtë fjalor enciklopedik, një zë të veçantë dedikuar Enver Hoxhës. Ne të gjenden jo pak rreshta mbi jetëshkrimin e Enver Hoxhës, dhe shumë pak rreshta dedikuar në formë përshkruese të Enverit si themelues i një sistemi stalinist në Shqipëri, duke relativizuar diktaturën dhe përgjegjësinë e tij historike, ndërsa vëmendja përqendrohet kryesisht te jetëshkrimi politik dhe dekoratat që ai mori gjatë regjimit që vetë krijoi.
Si Kuvendi i Shqipërisë si Akademia e Shkencave e kanë konsideruar të nevojshme të mos neglizhojnë figurën e diktatorit pa e fiksuar në fjalorin enciklopedik dhe kalendarin enciklopedik të personaliteteve kombëtare.
Jam pa fjalë!
