Puna e pare e ministres se jashtme Spiropali? Të thellojë bashkëpunimin me shtetin e Izraelit. Gjatë ditës së sotme Elisa Spiropali, ka reaguar ndaj urimit të ministrit izraelit Gideon Sa’ar, i cili i uroi sukses në detyrën e re.
Në një postim në platformën X, Sa’ar shkruante: “I uroj shumë suksese ministres së re të Shqipërisë për Evropën dhe Punët e Jashtme Elisa Spiropali. Ne vlerësojmë miqësinë e gjatë mes kombeve tona dhe e çmojmë veçanërisht bashkëpunimin tonë.”
Spiropali iu përgjigj duke vlerësuar mesazhin e tij dhe theksuar rëndësinë e marrëdhënieve mes Shqipërisë dhe Izraelit: “Shqipëria vlerëson thellësisht miqësinë historike dhe lidhjet e qëndrueshme me Izraelin dhe jemi gati të thellojmë bashkëpunimin, përfshirë edhe në fushën jetike të sigurisë, duke punuar së bashku për prosperitet dhe stabilitet të përbashkët.”
Qeveria e Shqipërisë ndërkaq nuk ka bërë deri më sot asnjë deklaratë apo qëndrim publik për situatën në Gaza. Politika shqiptare në përgjithësi dhe nga të gjithë krahët e ka kaluar në heshtje gjenocidin që po kryhet në Gaza. Pak ditë më parë Shqipëria abstenoi gjatë një votimi në OKB për rezolutën që kërkon krijimin e dy shteteve të Izraelit dhe Palestinës. Muaj më parë vetë kryeministri Edi Rama pat deklaruar se Shqipëria do të votojë pro krijimit të dy shteteve. Me votën e saj në OKB dhe me postimin e sotëm servil të Elises ndaj ministrit të jashtëm të Izraelit, Shqipëria mbetet një nga shtetet e izoluara të Europës Perëndimore që nuk ka qëndrim kritik për gjenocidin në Gaza.
