Pas javësh tensioni e pastrimesh imazhi ndërkombëtar, Izraeli mund më në fund të ndihet i sigurt, në krah ka ministren e Jashtme të Shqipërisë, Elisa Spiropali. E ftuar nga homologu izraelit Gideon Sa’ar, Spiropali zbarkoi sot në Tel Aviv për të sjellë “peshën diplomatike” të Tiranës në Lindjen e Mesme.
Në ndalesën e saj të parë, ajo vizitoi vendin ku ndodhi masakra e Festivalit Nova, duke theksuar se “kthimi i të gjitha pengjeve në shtëpi do të ishte një hap për mbrojtjen e dinjitetit njerëzor”, një frazë që, në një zonë lufte, tingëllon aq e padëmshme sa një kartolinë turistike.
Nga ana e saj, ministrja nënvizoi mbështetjen e Shqipërisë për “marrëveshjen e paqes të ndërmjetësuar nga Presidenti Trump”, duke e përshkruar atë si “të vetmen rrugë për stabilitet”. Me këtë, Spiropali e ktheu vizitën në një kujtesë se diplomacia shqiptare nuk lë bosh asnjë ftesë, qoftë edhe në mes të një konflikti ku edhe engjëjt kërkojnë të largohen.
