Një ditë jo fort e mirë për socialistët kjo e premte e 31 tetorit. Fatos Nano, ish-lideri historik i Partisë Socialiste, ndërroi jetë në një spital privat në Tiranë, ku ndodhej prej më shumë se një muaji në gjendje kome. Largimi i tij u shënua mes kolapsit moral të një partie që ai dikur e ngriti dhe që sot duket se endet në mes të fatit dhe gjykatave.
Ndërkohë, Zëvendëskryeministrja dhe ministrja e Infrastrukturës dhe Energjitikës, Belinda Balluku, u paraqit në SPAK, ku zyrtarisht iu komunikua akuza për shkelje të barazisë në tendera.
“Në respekt të plotë të organeve të drejtësisë, kam pranuar kërkesën e Prokurorisë së Posaçme për një çështje në hetim. Si një qytetare e Republikës së Shqipërisë dhe si zyrtare publike, e shikoj këtë si një proces që besoj se do të bazohet mbi transparencën, llogaridhënien dhe mbi të gjitha në parimet e drejtësisë së pandryshueshme”, tha Balluku.
Por nëse numri dy i qeverisë do të vijojë përballjen me drejtësinë në gjendje të lirë, Erion Veliaj, ish-kryebashkiak i Tiranës, prej orës 10 të ditës së sotme, në një seancë maratonë, kërkoi të shpallet antikushtetues shkarkimi i tij nga detyra.
“Tirana është një qytet që rreh me pulsin e kombit tonë. Arsyeja për të më larguar, mungesa tre mujore në detyrë, është fyerja më e rëndë e jetës sime, sepse erdhi nga bashkëpunëtorët e mi, ata që më njohin më mirë se kushdo tjetër, që as nuk më njoftuan e as nuk më dëgjuan. Zoti i faltë, sepse nuk dinë çfarë bëjnë. Lutem për ta çdo natë”, deklaroi Veliaj, teksa në sfond rëndojnë 13 akuza penale, 9 prej të cilave për korrupsion.
Një ish-lider që shkon, një zëvendëskryeministre që hyn në dyert e SPAK-ut, një ish-kryebashkiak që lufton për t’u mbajtur gjallë politikisht dhe juridikisht. Një ditë e fantazmave për socialistët, të gjallë e të ikur, që vërtiten mes hijes së një të shkuare të pushtetshme dhe një të ardhmeje të pasigurt.
Në këtë të premte, Partia Socialiste nuk pati vetëm një humbje fizike, por edhe një kujtesë të dhimbshme se pushteti nuk mbron gjithmonë nga gjykimi, as i historisë, as i drejtësisë.
