Kryetari i Partisë Demokratike, Sali Berisha, është shprehur se e mirëpret fletëthirrjen e SPAK për çështjen e “21 Janarit”. Pas përfundimit të mbledhjes me grupin parlamentar të PD-së, Berisha deklaroi për mediat se ai është personi që ka kërkuar më shumë se kushdo tjetër hetimin e ngjarjeve tragjike të 21 janarit, ndërsa sipas tij, penguesi kryesor i drejtësisë ka qenë Edi Rama.
“Unë nuk kam marrë asnjë fletëthirrje, për faktin e thjeshtë se Alfred Greca ua jep gazetarëve para se të ma japë mua. Unë s’kam asnjë problem, sepse jam njeriu që kam kërkuar më shumë se kushdo tjetër hetimin e atyre ngjarjeve tragjike. Kam kërkuar prokuror ndërkombëtar për hetimin e tyre. Që prej vitit 2013 e deri më sot, është vetëm Edi Rama ai që ka penguar hetimin. Sali Berisha ka kërkuar prokuror ndërkombëtar, hetim, dhe fatmirësisht ka deklaratat e SHBA-ve, ku zoti Shtaimer erdhi si asistent i tyre dhe Contrimen kërkoi hetime ndaj policisë dhe organizatorit. Organizatori dihet kush është. Jam i hapur të hetohet kjo ngjarje,” – tha Berisha.
Kryedemokrati foli gjithashtu për platformën që pritet të ngrihet para Kryeministrisë, duke theksuar se ajo do të ketë karakter të përditshëm dhe do të synojë largimin e Edi Ramës dhe zv.kryeministres Belinda Balluku. Megjithatë, ai përjashtoi mundësinë e bojkotit institucional nga ana e opozitës.
“Platforma para Kryeministrisë ka dy qëllime ultimatume: së pari, largimin e Edi Ramës dhe Belinda Ballukut. Do të jetë me ditë të caktuara, më së shumti të enjten. Do ta kthejmë Kuvendin në bazën e rregullores. Të gjitha format e domosdoshme për rikthimin e normalitetit parlamentar do të zbatohen. Nuk ka ndonjë surprizë — shkoni nesër në komisione dhe do ta shihni. Vendimi është i prerë,” – deklaroi Berisha.
Megjithëse përsëriti thirrjet për protesta, Berisha nuk dha një datë konkrete për nisjen e tyre, duke u mjaftuar të thotë se do të ndodhin “shumë shpejt”.
Kreu i PD-së foli gjithashtu për zgjedhjet e pjesshme në pesë bashkitë e vendit, ku partia që ai drejton nuk mori pjesë me kandidatë zyrtarë, por mbështeti kandidatët e pavarur, të cilët humbën të gjithë. Megjithatë, Berisha shfrytëzoi këtë situatë për të komentuar rezultatin, duke mos pranuar dhe as mohuar se PD-ja kishte bojkotuar zgjedhjet nga frika e një humbjeje të radhës.
“Falenderoj përzemërsisht kandidatët e pavarur për guximin e treguar, dhe kjo faktoi se Shqipëria është në një farsë elektorale, në një diktaturë totalitare, dhe se vendi po njihet si i tillë. Qytetarët e panë qartë, ishte vetëm një farsë elektorale. Ne nuk morëm pjesë direkt në zgjedhje, por i mbështetëm ata, dhe kjo nuk ishte bojkot nga ana jonë. Ne bëmë thirrje për qytetarët që të votonin dhe mbështetëm kandidatët e pavarur,” deklaroi Berisha.
