Pasi Oerd Bylykbashi u kujtua që paska një komision për reformën zgjedhore ku ai është bashkëkryetar, Ilirjan Celibashi u kujtua që vitin tjetër i mbaron mandati i dhënë nga Berisha në KQZ. Dhe për këtë hartoi një shkresë ku i prezanton Kuvendit idetë e tij personale se si duhet të ndryshohet Kodi Zgjedhor. Propozimet janë firmosur në cilësinë e tij si Komisioner Shtetëror i Zgjedhjeve.
Por rezulton që Komisioneri Shtetëror i Zgjedhjeve është një nga organet drejtuese të KQZ. Kështu, duke qenë se propozimet nuk sqarohen si të konsultuara me organet e tjera drejtuese, lista e propozimeve mund të jetë vetëm e Celibashit si ekspert i zgjedhjeve, por jo e Celibashit si Komisioneri i parë i Zgjedhjeve.
Si ekspert zgjedhjesh, Celibashi pasi u njoh me prononcimin e Bylykbashit për draftin e referendumeve, u kujtua që shkresa duhej bërë shpejt.
Hekuri rrihet sa është i nxehtë dhe Celibashi nuk humbi kohë t’i bëjë shkresë Kuvendit që t’i japë një dorë Oerdit. Problemi është që për t’i dhënë një dorë Oerdit, duhet t’i shkruajë tekstet e jo ta mbështesë me detyra. Sepse deputeti i PD problemin e ka që nuk di të shkruajë draft. Ndaj po i kërkon Taulant Ballës që t’i japë draftin e tij që Oerdi ta paketojë si veprën e vet në 20 vitet e ardhshme.
Epo, miqtë e mirë në kohë të vështira. Celibashi dhe Bylykbashi mesa duket e kanë nxënë me kohë këtë mësim.
