Ngjarja tronditëse e Shkodrës, me dy viktima dhe disa të plagosur, nuk nxiti një reflektim mbi përgjegjësinë e policisë, por solli një deklaratë të gjatë “si qytetar i indinjuar” nga drejtori i përgjithshëm i Policisë së Shtetit, Ilir Proda.
Në vend që të japë llogari për faktin se bandat qarkullojnë të armatosura mesditës në qytet, Proda zgjodhi të falënderojë policët për “angazhimin maksimal” dhe ta kthejë reagimin e tij në një letër urimi e ngushëllimi, ku përgjegjësia institucionale mungon krejtësisht.
Drejtori kujton se u kap autori i ngjarjes, se u “shkatërrua një bazë kriminale” dhe se po punohet intensivisht, por harron të përmendë si u la Shkodra të bjerë në duart e bandave, pse krimet përsëriten dhe pse qytetarët jetojnë në frikë.
Deklarata e tij e mbyllur me ftesën për qytetarët që të bashkëpunojnë me policinë, më shumë i ngjan një fjalimi motivues në sallë konference sesa një reagim të një institucioni përgjegjës që duhej të siguronte qytetin. Në këtë histori, policia na rezulton më shumë si spektatore e indinjuar sesa si garant i sigurisë publike.
