Në një intervistë për Report TV, aktori i njohur Robert Ndrenika ka folur në lidhje me diskutimet për praninë e tij në seancën gjyqësore në mbështetje të Erion Veliajt. Në reagimin e tij, Ndrenika shprehet se njeriu i di vetë gjërat e tij dhe se ai kryebashkiakun e njeh mirë dhe e ka si djalin e tij.
‘Po pse pra reagojnë kështu?! Hë, ma thuaj ti! Njeriu i di vetë gjërat e tij. E kam djalë të adoptuar! Ia njoh jetën mirë dhe ma njeh jetën mirë. E kam si djalin tim. Më lajmëruan njerëz të afërt të Erionit se ishte seanca dhe më pyetën nëse doja të shkoja. Shkova pa u menduar dy herë.
Aktori i njohur thotë se nëse do të jetë e nevojshme do të shkojë sërish në mbështetje të Veliajt.
‘E kam bir për shpirt. E njoh dhe e vlerësoj, ia njoh jetën dhe ma njeh edhe ai timen. Nëse do të ketë sërish nevojë, prapë do të jem aty. Njeriu nuk ka të afërm vetëm prindërit, fëmijët apo motrën e vëllanë. Ka edhe njerëz që i zgjedh vetë rrugës dhe i bëhen të afërt. Veç të tjerash, Erioni realizoi një ëndërr të madhe timen dhe të shumë artistëve: Një teatër të madh, të bukur dhe modern në qendër të Tiranës, që shpejt do të jetë gati’, është shprehur Ndrenika.
