Florian Haçkaj reagoi përmes një postimi në Facebook lidhur me zërat që e përmendin si një nga tre kandidatët e mundshëm të opozitës për zgjedhjet e pjesshme në Tiranë, për t’u përballur me socialisten Ogerta Manastirliu.
Reagimi i tij erdhi një ditë pas dakordësisë së partive opozitare për tre kandidatë potencialë që do të sfidojnë Manastirliun në zgjedhjet e parakohshme për Bashkinë e Tiranës. Emrat e përzgjedhur janë Edlira Çepani, Ermal Hasimja dhe vetë Florian Haçkaj.
Në postimin e tij, Haçkaj shprehet i nderuar që emri i tij u propozu si një opsion për opozitën dhe falënderon të gjithë ata që e kanë mbështetur këtë ide. Ai thekson se çdo angazhim politik kërkon vendimmarrje të kujdesshme dhe përgjegjësi të lartë, dhe një vendim i tillë mund të merret vetëm në rast të një propozimi zyrtar.
“Opozita ka nevojë jetike për një figurë përbashkuese. Si Edlira Çepani, ashtu edhe Ermal Hasimja janë personalitete që i vlerësoj shumë dhe që mund ta përmbushnin këtë detyrë në mënyrën më të mirë,” shkruan Haçkaj.
Reagimi i plotë në Facebook
Ndihem i nderuar që emri im është propozuar si një nga kandidatët e mundshëm të opozitës për Bashkinë e Tiranës dhe falënderoj të gjithë ata që e kanë sugjeruar dhe mbështetur këtë ide.
Ky nuk është vetëm një vlerësim personal, por edhe një njohje e rolit që Diaspora për Shqipërinë e Lirë ka dhënë dhe mund të japë në forcimin e opozitës dhe në zhvillimin demokratik të vendit.
Çdo angazhim politik kërkon vendimmarrje të matur dhe përgjegjësi të lartë e një vendim i tillë mund të merret vetëm në rast të një propozimi zyrtar.
Opozita ka nevojë jetike për një figurë përbashkuese. Si Edlira Çepani ashtu edhe Ermal Hasimja janë personalitete që i vlerësoj dhe që do ta përmbushnin më së miri këtë detyrë.
Me respekt,
Florian Haçkaj
