Kuvendi publikon listën e personaliteteve kombëtare të muajit tetor ku përfshihet edhe ish-diktatori komunist Enver Hoxha.
Për këtë çështje ka reaguar me indinjatë Enriketa Papa, e cila thotë se ky vendim vjen në një moment kur universitetet shqiptare po punojnë për të ndërgjegjësuar brezat e rinj mbi pasojat e regjimit totalitar të Enver Hoxhës, përmes studimeve mbi drejtësinë tranzitore dhe trajtimin e traumave kolektive.
“Nuk doja ta besoja, por fatkeqësisht lajmi është i vërtetë,” shkruan ajo, duke e cilësuar këtë akt si “mizor” dhe “një fyerje të rëndë ndaj viktimave të diktaturës komuniste”. Sipas saj, një ndjesë formale nuk mjafton më, sepse vendime të tilla “riprovojnë plagët e së kaluarës dhe minojnë përpjekjet për pajtim dhe kulturë demokratike”.
Ajo kujton gjithashtu Rezolutën e Kuvendit të Shqipërisë të datës 30 tetor 2006 (nr. 11), me të cilën Parlamenti dënoi krimet e regjimit komunist dhe e cilësoi qartë Enver Hoxhën si “themeluesin dhe ekzekutuesin e sistemit diktatorial më represiv në Europën Lindore”. Në këtë dokument, Kuvendi kërkonte heqjen e të gjitha titujve dhe dekoratave të dhëna gjatë periudhës komuniste dhe rishikimin e datave simbol që lidhen me atë regjim.
Në mbyllje, Papa e quan vendimin aktual të Kuvendit “një hap të rrezikshëm prapa në përballjen me të kaluarën”, duke e konsideruar atë si një mohim të kujtesës historike dhe një fyerje për kujtimin e viktimave të komunizmit.
