Karma digjitale e Kryeministrit përsëritet. Ndërsa ende na ushtojnë fjalimet e tij vizionare për digjitalizimin e Shqipërisë, deri në heqjen e parasë fizike, si dhe turpërimin që u bëri bankave që nuk janë, sipas tij, të përparuara në digjitalizim dhe për këtë arsye duhet të vendoseshin nën kujdesin e AKSHI-t për sistemet, realiteti është krejt tjetër.
Në shërbimet digjitale që ofrojnë institucionet e shtetit s’na u nda talloni dhe racioni. Ato nuk janë në gatishmëri pune 100%, ose, siç synohet me praktika të mira, afër 100%. Një herë punojnë, disa herë nuk punojnë. Këtë “dembelizëm” të sistemeve e vuajnë qytetarët dhe bizneset, të cilët nuk arrijnë dot të përmbushin nevojat që kanë.
Dhe të mos harrojmë që për të tilla sisteme fondet e buxhetit, pra paratë që paguajmë ne të gjithë, janë të konsiderueshme. Megjithatë, qeveria dhe institucionet e Ramës nuk e kanë parë të arsyeshme të kenë tregues përgjegjshmërie për cilësinë dhe vijueshmërinë e shërbimeve të tilla.
Një lutje në fund, z. Kryeministër: ridrejtoje thepin e pushkës kundër drejtësisë nga dosja e Belës te dosja Mirlindës. Më mirë të shpëtosh Mirlindën që të na funksionojnë sistemet, se për në Kanada gjejmë edhe rrugë alternative për të shkuar, apo për në BE le të vonohemi edhe ca, se jemi mësuar pa të. Dhe shkarkoje atë Diellën, se nuk i ndihet fare zëri e as i ka dukur puna.
