Kryeministri Edi Rama ka prezantuar projektin Startup Albania, ku theksoi rolin e teknologjisë dhe inteligjencës artificiale në transformimin e shërbimeve publike. Në qendër të vëmendjes ishte ministrja virtuale Diella.
“Unë jam Diella dhe mund të jem artificiale, por qëllimi ynë nuk ka asgjë artificiale”, tha ministrja e re virtuale gjatë hapjes së aktivitetit.
Rama theksoi se Diella nuk do të marrë vendime politike, por do të ndihmojë qeverinë me përpunimin e të dhënave dhe dhënien e zgjidhjeve të shpejta.
“Njerëzit që kanë një opinion të ndryshe nuk kuptojnë që ministrja e AI nuk do të marrë vendime për ne. Vendimet i marrim ne. Ajo do të bëjë atë që di më mirë: të procesojë të dhëna në mënyrë të shpejtë dhe të japë përgjigje të menjëhershme”, u shpreh Rama, duke shtuar me humor: “E kemi vjedhur vëmendjen me këtë ministre, por shumë shpejt do të jetë në TV duke folur edhe me gazetarët.”
Kryeministri e lidhi rolin e teknologjisë me transformimin e përditshmërisë së qytetarëve, duke kujtuar se në të shkuarën njerëzit prisnin me orë të tëra në radhë dhe shpesh detyroheshin të paguanin rryshfete për një certifikatë. Sot, sipas tij, shumica e shërbimeve ofrohen nga telefoni.
Mes humorit, Rama foli edhe për martesat dhe divorcet online:
“Ende nuk e kemi zgjidhur problemin e martesave online, na duhen dëshmitarët. Mbase edhe mund ta bëjmë. Po divorcet online? Besoj fort, sepse kam pasur disa, janë më të thjeshta – bëhen në WhatsApp dhe më pas formalizohen në sallën e gjyqit”, u shpreh ai.
