Pasi dështoi me mbylljen e TikTok për të parandaluar dhunën mes të rinjve në shkolla, kryeministri Edi Rama, ka folur për hapin e radhës për t’iu përgjigjur këtij problemi dhe ai është projekti “Smart City Albania”.
“Siguria në shkolla ndryshon rrënjësisht”, tha Rama gjatë prezantimit të projektit, i cili parashikon instalimin e një rrjeti të avancuar kamerash dhe radarësh për të rrisë sigurinë publike.
Por kamerat duket se më shumë do kenë rol identifikimi në raste dhune mes nxënësve sesa të parandalojë pasojat e saj.
“Qysh se ky sistem ka hyrë në shkolla, ka rënë në mënyrë drastike krimet e çdo natyre, por janë rënë në mënyrë drastike mungesat në shkollë, kopjet në shkollë, shfaqjet e kthimit të klasës në një kënd lodrash. Në momentin kur Policia e Shtetit ka nevojë të bëjë një verifikim, e ka të regjistruar”, tha Rama.
Sipas kryeministrit, ngjarjet e fundit në disa shkolla të vendit, ishin edhe për faj të mungesës së pamjeve të qarta duke vështirësuar punën e hetuesve.
“Tragjeditë që kemi pasur me shkollat, ka shumë arsye, por lidhen edhe me faktin që mospamja e pamjeve të qarta përpara, e vështirëson punën e hetuesve dhe policisë. Me këtë sistem, oborri është 24 në 24, sikur të kishte roje policie”, tha kryeministri.
Kujtojmë se që pas vrasjes së 15-vjeçarit, Martin Cani, të gjitha masat e qeverisë për të parandaluar këtë fenomen nuk kanë rezultuar të sukseshme. Kjo ngjarje ka pasurar incidente të tjera mes nxënësve të shkollave, ku vetëm në muajin e fundit janë regjistruar disa raste të tjera dhe fatkeqësisht me viktima. Para disa javësh 15-vjeçari, Erjon Boba, ndërroi jetë pas goditjeve që mori gjatë sherrit me bashkëmoshatarin e tij.
