Ndërpresim çdo lloj debati dhe komunikimi për çdo lloj funksioni me partinë e krimit – ky është vendimi që ka marrë Sali Berisha pas dështimit spektakolar të PD me Avokatin e Popullit. Një vendim që, në fakt, nuk kuptohet qartë se çfarë do të thotë , ndërkohë që nuk është marrë parasysh propozimi i kryetarit të Grupit Parlamentar të PD, Gazment Bardhi, për ta çuar procedurën në Gjykatën Kushtetuese, pasi proceduralisht firmat e propozimit të kandidaturës së Endri Shabanit ishin tërhequr me firmë dhe jo me deklaratë.
Në mbledhjen e Kryesisë së PD, kryetari Berisha i uroi Edi Ramës “ta gëzojë” Endri Shabanin dhe u kërkoi edhe njëherë falje demokratëve për gabimin që u bë me firmat. Ai njoftoi gjithashtu se në datën 22 dhjetor do të organizohet një protestë e madhe kombëtare, pa ndërprerje, deri në krijimin e një qeverie teknike që, sipas tij, do të garantojë zgjedhje të lira dhe të ndershme.
