Kreu i Partisë Demokratike, Sali Berisha, doli sot në një konferencë për mediat ku foli për herë të dytë mbi çështjen e ashtuquajtur “Aruba”. Ai akuzoi kryeministrin Edi Rama dhe disa ministra të tij për lidhje me grupe kriminale të trafikut të drogës.
Berisha kërkoi dorëheqjen e menjëhershme të Ramës, duke paralajmëruar se në të kundërt do të depozitojë padi në SPAK. Megjithëse e sulmon dhe e anatemon në çdo dalje publike, dhe e ka quajtur “vegël të Ramës”, kreu i PD duket se ende ruan besimin tek ky institucion.
“Në Arubas, aty e kanë vendin bosët e drogës. Mjaft zëra janë se delegacionin e ka kryesuar Edi Rama. Në charter thuhet se kanë qenë ministra. Agjencitë i dinë se kush janë. Rama duhet të japë dorëheqje, si person i rrezikshëm, bashkëpunëtor i organizatave të narkotrafikut. Charteri u nis nga Tirana. Nëse nuk jep dorëheqjen, do të ketë një padi në SPAK. Por do të shohim ligjet ndërkombëtare për shpalljen e karteleve si organizata kriminale nëse mund të bëeht padi dhe në Gjykatën ndërkombëtare”, tha Berisha.
Ndërkohë, kreu i opozitës dha sinjale se PD po nis përgatitjet për zgjedhjet e mundshme në Bashkinë e Tiranës. Sfida kryesore mbetet përzgjedhja e kandidatit që do të përballet me Ogerta Manastirliun. Sipas tij, është ngritur një grup pune i përbërë nga Flamur Noka, Belind Këlliçi dhe Ilir Alimehmeti, të cilët do të diskutojnë dhe negociojnë me forcat e tjera opozitare për një kandidat të përbashkët.
