Kreu i Autoritetit të Konkurrencës, Denar Biba, në vend që të fliste për çmimet që rriten si në treg të mbyllur apo për mungesën e vendimeve ndaj monopoleve, vendosi të propozojë diçka “më efikase”: leje për të përgjuar telefonat.
Në Komisionin e Ekonomisë, Biba tha plot seriozitet se në disa vende të BE-së — si Polonia, Italia apo Gjermania — autoritetet mund të hyjnë në celularë “për tre sekonda” dhe të nxjerrin të gjitha të dhënat, sepse “privatësia nuk është aq e rëndësishme sa shteti i së drejtës”.
Për ta mbështetur tezën e tij, ai mori shembullin e SPAK-ut dhe “sukseseve të tyre me Sky e EncroChat”, duke shtuar se edhe Autoriteti i Konkurrencës do të bënte “punë skrupuloze” nëse do të mund t’i hapte celularët e bizneseve — madje edhe fotot e tyre, për çdo rast.
Pra, ndërkohë që spitalet, kompanitë e telefonisë dhe bizneset e mëdha vendosin çmimet si të ishim në treg feudal, Autoriteti i Konkurrencës kërkon të bëhet… SPAK-u i telefonave.
Tani mbetet të shohim kush do t’i mbrojë konsumatorët — nga çmimet, apo nga konkurrenca që kërkon të na “shqyrtojë” galerinë e fotove.
