Kandidatë për deputetë të Partisë Demokratike, ish-deputetë dhe anëtarë të zgjedhur me votë brenda strukturave janë mbledhur për rreth tre orë për të diskutuar mbi të ardhmen e partisë më të madhe të opozitës — dhe këtë herë, “pa lejen” e Sali Berishës.
Në takim morën pjesë Ervin Salianji, Ilir Alimehmeti — më i votuari në Tiranë, Hysen Kadiu — që rezultati e nxori të parin në primaret e Tiranës por u la jashtë listave, Aulon Kalaja — më i votuari në listën e hapur të Durrësit, Gent Cela — më i votuari në Qarkun Fier, Qani Xhafa i Elbasanit, Ted Kopliku — më i votuari në Qarkun Shkodër, Xhemal Gjunkshi në Qarkun Dibër, Alma Kore — më e votuara në Gjirokastër, Parid Mahmutaj — më i votuari në Qarkun Berat, Nada Daullja në Qarkun Vlorë, si edhe një sërë kandidatësh të tjerë fitues të primareve.
Sipas burimeve, synimi i takimit ishte të dëgjoheshin mendimet dhe eksperiencat e fituesve të primareve, për të gjetur zgjidhjet më të mira për PD-në në këtë moment të rëndësishëm politik.
Takimi është zhvilluar në një ambient pranë selisë së PD-së.
Lëvizja vjen në një kohë kur pakënaqësitë në bazën e demokratëve janë bërë të dukshme — për mënyrën si po bëhet opozitë dhe për serinë e humbjeve, si në zgjedhjet e përgjithshme ashtu edhe në ato lokale.
