Kryetari i Partisë Demokratike, Sali Berisha, ka komentuar zgjedhjen e Avokatit të Popullit edhe për mediat jashtë Kuvendit. Për të justifikuar firmat që deputetët demokratë i dhanë Endri Shabanit, Berisha tha se ai i mori votat në periudhën kur mbështeti kandidatin e pavarur Florjan Binaj për kryetar bashkie në Tiranë.
“Unë nuk them që nuk i mori firmat Endri Shabani. I mori në një periudhë Endri Shabani kur ai mbështeti Florian Binën, se nuk mund të them që nuk ishte një koalicion moral i plotë i të gjitha forcave politike. Por pastaj dolën një seri problemesh që faktuan se ai që kishte atë fjalor si opozitar i opozitës, nuk ishte vetëm kaq, por ishte një person me lidhje kryekëput me Edi Ramën. Deputetët tanë kanë tërhequr firmat, me shkresë. Është praktika më e zakonshme të tërheqësh propozimin. Mund të mos e kishin firmosur, të drejtë ke, por mos u përpiqni ta mbuloni. Ato firma u dhanë për shkak të atij koalicioni që u krijua, pastaj doli që kur u analizua Endri Shabani, doli e lidhur çdo gjë me Edi Ramën”, tha Berisha.
Kreu i PD gjithashtu vuri në pikëpyetje nëse opozita do të vazhdojë bashkëpunimin në komisionet e përbashkëta me mazhorancën për reformën zgjedhore dhe territoriale, por pa dhënë një përgjigje të prerë.
“Nuk është çështja e dy reformave këtu, është çështja e një qëndrimi të prerë përfundimtar. Sepse ne u angazhuam për Avokatin e Popullit në interes të qytetarëve. Ishte në interes të shqiptarëve të kishin një njeri të guximshëm, të mbronte sadopak të drejtat e tyre. Tani çfarë mbetet të diskutojmë me ta, që do mashtroni përsëri, jo”, tha Berisha.
