Seanca plenare e ditës së sotme ka nisur me tensione, pasi opozita kërkoi që diskutimi i programit të qeverisë, i zhvilluar javën e kaluar, të rikthehet sërish në rend dite. Kërkesa u hodh poshtë nga Kryetari i Kuvendit, Niko Peleshi, duke shkaktuar përplasje verbale mes palëve.
Peleshi, para nisjes së seancës, mblodhi Konferencën e Kryetarëve për miratimin e listave të anëtarëve të depozituara nga tre grupet parlamentare të opozitës, si dhe propozimet e Partisë Socialiste. Çështja kaloi për votim në seancën plenare. Deri tani, janë miratuar vetëm kryetarët dhe nënkryetarët e propozuar nga PS, ndërsa komisionet parlamentare vijojnë të mbeten jo funksionale për shkak të mungesës së përfaqësuesve të opozitës. Një ditë më parë, PD njoftoi se kishte dorëzuar emrat për 4 komisionet që i takojnë asaj të drejtojë.
Në rend të ditës janë përfshirë projektvendimi “Për caktimin e përbërjes së komisioneve të përhershme të Kuvendit” dhe projektvendimi “Për caktimin e anëtarëve zëvendësues në përbërjen e komisioneve të përhershme”.
Deputetja Jorida Tabaku kërkoi korrigjim të procesverbalit të seancës së kaluar, duke theksuar se opozitës nuk mund t’i mohohet e drejta për debat.
“Unë e kuptoj, qeveria nuk ka vizion, por nuk mund t’ia mohoni opozitës të drejtën për një debat parlamentar. Të drejtën e fjalës nuk na e hiqni dot,” u shpreh ajo.
Ndërsa deputeti Belind Këlliçi akuzoi drejtuesit e seancës për manipulim të procesverbalit dhe mospasqyrim të realitetit.
“Nuk mund ta kaloni këtë seancë sikur gjithçka është normale. Ai procesverbal nuk reflekton situatën e javës së kaluar. Në vetëm 25 minuta diskutim, nuk u dëgjua as fjala e opozitës. Kjo është një njollë turpi për këtë Kuvend dhe për ju si kryetar,” deklaroi ai.
