Mbledhja e Këshillit të Mandateve dhe Imunitetit, po vijon që prej orës 10:30 ku po shqyrtohet kërkesa e SPAK drejtuar Kuvendit për heqjen e imunitetit të deputetes Belinda Balluku, me qëllim hapjen e rrugës për arrestimin e saj.
Mbledhja po zhvillohet me dyer të mbyllura. Të pranishëm janë anëtarët e Këshillit të drejtuar nga Niko Peleshi, kreu i ri i SPAK Klodian Braho dhe dy prokurorët e kësaj çështjeje Dritan Prençi dhe Dorina Bejko.
Demokratët kërkuan që mbledhja të mbahet me dyer të hapura, por kjo kërkesë nuk është pranuar nga mazhoranca.
Pas përfundimit të debatit dhe leximit të relacionit nga kryetari Niko Peleshi, prokurorët kanë vijuar me paraqitjen e dosjes dhe argumentimin e kërkesës për heqjen e imunitetit të Ballukut.
