Deputeti i Partisë Socialiste, Erion Braçe, ka shprehur kundërshtinë e tij ndaj projektligjeve të propozuara nga ministri i Financave, Petrit Malaj, lidhur me marrëveshjen fiskale që ka shkaktuar debat të madh për transparencën e përfituesve.
Gjatë një interviste në “Top Story”, Braçe sqaroi se kundërshtimet e tij lidhen me mënyrën si trajtohen detyrimet e së kaluarës dhe me mungesën e qartësisë në përfitimet që do të marrin bizneset e mëdha.
“Gjoba nuk shuhet as falet. Bankers është nën hetim penal. Nuk përfiton nga marrëveshja e paqes fiskale nga fillimi në fund. Ka dy ligje që janë konsideruar si amnisti. Ligji për shuarjen e detyrimeve fiskale 10 vite përpara, për pjesën 2014-2019, ka një skemë favorizuese për ata që do e paguajnë menjëherë. Komisioni i Ekonomisë dje ka bërë dy ndryshime themelore. Kemi shtrirë detyrimet. I dyti ka të bëjë me transparencën, ka qenë propozim i Bozdos dhe është mbështetur nga unë dhe e gjithë trupa e deputetëve. Ata që janë borxhli të mëdhej të shtetit dhe përfitojnë, do të jenë publikë. Përfiton, publikohet. Vijmë dhe te paqja fiskale, unë nuk i pranoj dot, jam kundër. Sa kohë ke bërë biznes, ke fituar dhe nuk ke paguar. Për mua nuk duhet të ketë shuarje detyrimesh. Për gjykimin tim, ligji nuk është shkruar mirë, pavarësisht qëllimit”, u shpreh Braçe.
Sipas tij, transparenca duhet të jetë e pakompromis dhe çdo biznes që përfiton nga dispozitat e projektligjit duhet të bëhet publik, ndërsa ai vetë është kundër çdo forme që konsiderohet si amnisti për detyrimet e pashlyera.
