Ambasada e Shteteve të Bashkuara ka publikuar një njoftim të rëndësishëm lidhur me situatën e krijuar nga vonesat në miratimin e fondeve buxhetore në SHBA, të cilat kanë pezulluar përkohësisht një pjesë të funksioneve qeveritare.
Përmes një mesazhi zyrtar, Ambasada bën me dije se faqja e saj në Facebook nuk do të përditësohet rregullisht deri në rikthimin e normalitetit administrativ.
“Për shkak të vonesës në miratimin e fondeve buxhetore, kjo llogari në Facebook nuk do të përditësohet rregullisht – me përjashtim të informacioneve urgjente për çështjet e sigurisë – derisa të rinisë veprimtaria e rregullt. Gjatë kësaj kohe, shërbimet e planifikuara të pasaportave dhe vizave për tranzit në Shtetet e Bashkuara dhe në ambasadat e konsullatat jashtë vendit do të vazhdojnë sipas mundësive,” thuhet në njoftim.
Ambasada u bën thirrje qytetarëve që të referohen në faqen zyrtare të saj për më shumë informacion mbi shërbimet konsullore dhe statusin operativ aktual.
Ky njoftim vjen në një moment kur SHBA rrezikon një “government shutdown”, një situatë e njohur që ndodh kur Kongresi nuk miraton në kohë buxhetin vjetor, duke ndikuar në funksionimin e shumë agjencive federale.
