Ministri i Ekonomisë, Kulturës dhe Inovacionit – Blendi Gonxhja, vendosi t’u japë shqiptarëve sot një lajm të mirë. Jo rritje pagash dhe as ulje çmimesh. Shqipëria, sipas tij, është në krye të Ballkanit për “ekonominë e gjelbër”. Dhe këtë e tha me aq pasion, sa për një moment menduam se kishte rilindur ndonjë pyll aty ku vitet e fundit është ndërtuar ndonjë pallat shumëkatësh.
Gonxhja tha sot se, sipas një raporti të OECD-së, Shqipëria ka kaluar fqinjët në “Greening Cluster” dhe është renditur madje mbi mesataren e BE-së. Nuk është çudi që fjalët “cluster” dhe “scoreboard” të tingëllojnë bukur në status, sidomos kur i lexon në një zyrë me ajër të kondicionuar, ndërsa jashtë qyteti është mbuluar nga betoni, pemët mbillen për të bërë foto dhe më pas ndërrohen në kulla.
Tirana sot është simboli më i bukur i këtij “gjelbërimi strategjik”: hapësirat publike shndërrohen në kantier, pemët i sheh vetëm nëse janë murale, ndërsa ajri ka nevojë për filtër më shumë sesa për statistikë. Në bregdet, politika e gjelbër e qeverisë është aq e avancuar, sa jep leje për ndërtime shumëkatëshe mbi rërë, ndërsa në jug edhe zogjtë janë trembur nga zhurma e vinçave dhe betonierave.
Por këto nuk i sheh Ministria e Ekonomisë, e Kulturës dhe e Inovacionit, si koordinatore e raportit, që sigurisht që mbetet “e angazhuar” për zhvillimin e politikave të qëndrueshme.
E vetmja gjë e qëndrueshme në këtë histori, është aftësia për të shitur çdo kontrast si sukses: ndotjen si progres, betonin si zhvillim, dhe një raport ndërkombëtar si fletë lavdërimi për një realitet që nuk e mbulon dot më as retorika. Të paktën, zoti Gonxhja të kishte gjetur ndonjë foto me pemë të vërteta për ta shoqëruar statusin. Por edhe ato, duket se i ka zënë ndonjë projekt i gjelbër vetëm në PowerPoint.
