Ron Yeffet, miku i kryeministrit Edi Rama që ka tashmë monopolin e prodhimit të mjeteve të ushtrisë, rezulton të ketë në zotërim disa kompani.
Izraeliti Yeffet me pasaportë shqiptare bleu më 17 qershor 2025, 49 për qind të aksioneve të kompanisë TImak.
Këto aksione ai i bleu nga Arjeta Puca për vlerën e 490 eurove.
Puca e krijoi kompaninë Timak në 2016 dhe vitet e fundit ishte ndër zonjat më të promovuara nga kryeministri Rama.
Sipas të dhënave të Open Data, me 4 gusht kompania shtetërore Kayo dhe Timak themeluan një kompani të përbashkët që quhet Timak Defence. Kjo kompani, Timak Defence zotërohet 80 për qind nga Timak dhe 20 për qind nga shoqëria shtetërore Kayo.
Referuar të dhënave të Open Data, izraeliti Ron Yeffet, që njihet si një prej miqve të afërt të Edi Ramës, zotëron dhe disa kompani të tjera.
“1820” Albania është një kompani e thelemuar në vitin 2023 me kapital shqiptar dhe të huaj.
Sipas aktit të themelimit dhe statutit të shoqërisë, 50 për qind të aksioneve zotërohen nga Dorel Yehuda Shalmoni, shtetas portugez, i lindur në Izrael, 25 për qind zotërohen nga Hen Shahar shtetas izraelit dhe 25 për qind të aksioneve janë në pronësi të Ro Yeffet, izraelit me pasaportë shqiptare. Kompania ka si aktivitet pagesat elektronike.
Ron Yeffet është zotëron në masën 100 për qind i kompanisë 1820 Black Oil që ka si objekt tregtimin me shumicë të naftës bruto dhe nënprodukteve të saj, import, export shitje me shumicë e pakicë të vajrave lubrifikantë, lëndëve djegëse dhe produkteve të tjera.
Izraeliti Yeffet që ka dhe pasaportë shqiptare zotëron në masën 100 për qind edhe kompaninë UNO18 e cila ka si objekt tregtimin me shumicë dhe pakicë të pjesëve të këmbimit të mjeteve të ndryshme fluturimi, avionë, helikopterë dhe të tjera pa kufizim. Emri i Yeffet nuk lakohet për herë të parë në vendin tonë, por këtë herë duket se për shkak të miqësisë me kreun e qeverisë ai ka mundur të marrë monopolin e prodhimit të mjeteve të ushtrisë.
