Kryetari i Partisë Demokratike, Sali Berisha, e ka cilësuar si të bazuar në Kushtetutë zgjedhjen e Klodian Braho s në krye të SPAK. Në një deklaratë për mediat, Berisha tha se Braho u zgjodh në përputhje me ligjin, në dallim të madh nga pararendësi i tij Altin Dumani.
Ai kritikoi gjithashtu anëtarët e KLP, duke i quajtur “mizogjene”, pasi nuk i dhanë asnjë votë kandidates së vetme femër në garë, Doloreza Musabelliu.
“Dje u zbatua Kushtetuta. Nuk u zgjodh si i pari me 5 vota, që ishte jo kushtetues dhe që s’mund të rrinte asnjë ditë në detyrë. I dyti mori 7 vota. Dhe komenti i dytë, aty ishte një zonjë çka tregon se ajo trupë e KLP është mizogjene, nuk i dhanë asnjë votë. Ishte një zonjë aty, ajo nuk shkoi vet aty. Në KLP e dërgoi komisioni i SPAK. Dy tre zonja që ishin në KLP, nuk menduan t’i japin një votë, e nxorrën pa asnjë votë. Këto dy komente kam unë për zgjedhjen e djeshme. U zgjodh në përputhje me Kushtetutën, në dallim të madh nga pararendësi i tij që s’ka Kushtetutë as ligj. Por këtu u zbatua Kushtetuta”, tha Berisha.
Por duket se kreu i PD nuk do të kursejë anatemimet edhe ndaj kreut të ri të SPAK. Ai tha se do ta quaj sërish organizatë kriminale çdo prokuror që do të kryejë hetime njësoj siç janë bërë në dosjen “Toyota Auris”. Në fakt, këtë dosje e ka hetuar kreu i sapozgjedhur i SPAK, Klodian Braho, për të cilën Berisha pretendoi se është një dosje që tregon se në Prokurorinë e Posaçme ka një organizatë kriminale të përbërë nga pesë emra.
“Cilido që mendon se deklaratën për organizatë kriminale e kam politike, i kërkoj vetëm një gjë: të lexojë dosjen ‘Toyota Auris’. Dhe do bindet nëse ka në SPAK një grup të strukturuar kriminal apo një organizatë kriminale të përbërë nga 5 emra. Nëse ti ke të gjitha këto dhe nuk merr asnjë masë brenda SPAK, si mund të besoj unë? Nesër, po të gjej një dosje të këtij, absolutisht të njëjtën gjë do them, po të gjej një grup tjetër. Unë jam opozitë, do mbroj interesin publik pavarësisht nga çdo çmim”, tha Berisha.
