Sali Berisha e bëri edhe një herë të qartë se në Partinë Demokratike nuk ka më vend për Ervin Salianjin, e aq më pak nëse ai ka pretendime për ta rivalizuar në garën e pritshme për kryetar të PD-së.
I pyetur nga gazetarët, Berisha la të kuptohet se ish-deputeti është sanksionuar sipas nenit 24 të statutit, çka do të thotë se Salianji nuk është më zyrtarisht pjesë e strukturave të PD-së. Megjithatë, sipas përcaktimeve statutore, për marrjen e një vendimi të tillë duhet të mblidhen forumet përkatëse, përfshirë edhe kryesinë e degës.
Në konferencën e përditshme për shtyp, kreu demokrat komentoi edhe nisjen e sesionit të ri të Kuvendit. Ai u shpreh se, ndonëse opozita është në një betejë të ashpër me atë që e cilësoi si “narkoqeveri”, deputetët demokratë do të vijojnë të jenë pjesë e punimeve parlamentare deri në një vendim të dytë.
